Ullarpeysan og regnhlíf einkennir sumarið

Kristrún Björgvinsdóttir er 16 ára Keflvíkingur í húð og hár sem eyðir sumrinu í körfuboltaæfingar í afrekshóp á vegum bæjarvinnunnar. Í haust mun hún hefja nám við Tækniskólann í Reykjavík en áður mun hún fara í tvær utanlandsferðir til Norðurlandanna.

Hvernig hefur sumarið verið?
Nokkuð fínt, ég er samt ekki að fýla veðrið eins og flestir.

Hvað er verið að gera í sumarfríinu?
Ég fór á tónleika með Frank Ocean, er á leið til Noregs, mun taka þátt í Unglingalandsmótinu og svo mun ég ljúka sumrinu á Fiskidögunum á Dalvík með fjölskyldunni.

Á að ferðast innan- eða utanlands?
Bæði, ég fór til Svíþjóðar í byrjun sumars og svo fer ég til Noregs núna í júlí.

Hvað einkennir íslenskt sumar að þínu mati?
Ullarpeysan og heitt kakó. Og þetta árið kannski regnhlíf!

Hvað á að gera um verslunarmannahelgina?
Það verður farið á unglingalandsmót á Höfn í Hornafirði.

Áhugamál þín?
Körfubolti, ljósmyndun og ferðast.

Áttu þér einhver áhugamál sem þú stundar bara á sumrin?
Liggja í sólbaði er það besta sem ég geri á sumrin.

Þegar þú heyrir orðið sumarsmellur, hvaða lag kemur upp í hugann?
We Can’t Stop með Miley Cyrus er mjög gott.

Hvað er það besta við íslenskt sumar?
Grilllyktin sem þekur bæinn í góðu veðri er ómótstæðileg og miðnætursólin er alltaf jafn falleg sem og útilegur með vinum og fjölskyldu.

En það versta?
Þegar það kemur ekki sól í margar vikur!

Hvað fer á grillið hjá þér í sumar?
Það sem pabbi skellir á grillið klikkar aldrei, en annars eru kjúklingabringur með BBQ.