Tveir leikmenn með útgáfutónleika á Trix í kvöld

Rappdúettinn Tveir Leikmenn úr Njarðvík sem er skipaður þeim Sigurði Ingólfssyni og Ástþóri Óðni munu halda útgáfutónleika á skemmtistaðnum Trix í kvöld þar sem þeir kynna frumraun sína, Í sitthvoru horninu.

Tveir leikmenn hafa verið starfandi í um 3 ár og komið víða fram en nú koma þeir loks fram með plötu. Víkurfréttir höfðu samband við Sigurð og spurðu hann út í plötuna og tónleikana í kvöld.

Þið eruð að gefa út ykkar fyrstu plötu, er þetta nýtt efni eða svona „best of“ frá ferli bandsins?
Já, þetta er okkar fyrsta plata og hún inniheldur lög sem við höfum sett saman á síðustu 3 árum, bæði gömul og ný.

Þið rappið að hluta til á íslensku, er það ekkert hamlandi eins og sumir rímnasmiðir vilja halda fram?
Við röppum á sitthvoru tungumálinu, en nei hingað til hefur það ekkert vafist fyrir mér, ég hef alltaf treyst mínu flæði.

Hefur platan verið lengi í vinnslu og eruð þið með DJ eða forritara sem spila með ykkur?
Platan hefur verið í vinnslu í 3 ár og var hún tekinn upp á þremur stöðum, Stúdíó Lubba Pís, Lyngholti 9 og í herberginu hans Ella upp á Akranesi. En í sambandi við taktana þá hafa fimm einstaklingar séð um þá alfarið og heita þeir Ingi Þór Ingibergsson, Elías Mar, Basic B, Kjarri Óla, Dóri Junglitz og Gaui(Ramses).

Hvert sækið þið yrkisefni ykkar? Hvað eruð þið að rappa um?
Við sækjum það úr okkar umhverfi og aðstæðum sem við höfum upplifað í gegnum tíðina.

Hvert er svo framhaldið? Fleiri plötur, eða meiri spilamennska?
Við erum alltaf að vinna í tónlist en spurning með aðra plötu, leyfum tímanum að leiða það í ljós. Við munum eitthvað fylgja disknum eftir t.d. á 17.júní verðum við fyrir framan Sparisjóðinn í Keflavík að kvöldi til og einnig á Landsmóti unglinga á Höfn í Hornafirði þann 5. ágúst svo eitthvað sé nefnt.

Svo að lokum, hverju geta tónleikagestir átt von á í kvöld?
Kynningu á disknum sjálfum og svo mun Ramses hita upp, húsið opnar kl 21:00, platan verður til sölu á staðnum en hún fæst líka í Hljómval, Vínylplötuni, Gallerí Sautján, Kóda, Mango og Blend. Svo er hægt að nálgast efni með okkur á www.Myspace.com/2leikmenn