Tveir fuglar náðust í Leirunni

„Tveir fuglar náðust í Leirunni,“ gæti verið skemmtileg fyrirsögn á golffrétt. Nýverið voru menn uppteknir við vinnu í golfskálanum í Leiru. Dyrnar voru opnar upp á gátt og allt í einu kemur starri á fullri ferð inn í skálann - með smyril á hælunum.

 

Upphófst mikill eltingarleikur inni í skálanum sem starfsmenn blönduðu sér í. Eftir smá hasar tókst þeim að veiða smyrilinn í net. Var hann myndaður í bak og fyrir og fékk að því loknu frelsi, án þess að hafa erindi sem erfiði því ekkert fékk hann í gogginn. Enn var starrinn laus í skálanum, hann var öllu erfiðari viðureignar en á endanum náðist að fanga hann og var honum einnig sleppt.