Tvær kvennasýningar í Duus safnahúsi
Konur í sögu bæjarins og Textíll í höndum kvenna
Konur eru í aðalhlutverki á þeim sýningum sem nú standa yfir í Gryfju og Bíósal Duus safnahúsa. Sýningarnar bera nöfnin Klaustursaumur og Filmuprjón - textíll í höndum kvenna og Konur í sögubæjarins. Á þeirri síðarnefndu er skyggnst inn í sagnaheim Mörtu Valgerðar Jónsdóttur.
Báðar sýningarnar eru settar upp í tilefni af 100 ára afmæli kosningaréttar kvenna 19. júní.
Á sýningunni Klaustursaumur og Filmuprjón eru textílverk úr safneign Listasafns Reykjanesbæjar, sýnishorn af hannyrðum kvenna sem búsettar eru á svæðinu og hannyrðir í eigu Byggðasafns Reykjanesbæjar.
Nafn sýningarinnar vísar í breitt svið þeirra verka sem sjá má á sýningunni og má þar telja annars vegar aldagamla útsaumsaðferð og hins vegar nýlegt listaverk sem samanstendur af prjónuðum filmum. Þó flokka megi öll verk sýningarinnar sem textílverk fela þau í sér afar ólíkar nálganir, bæði hvað varðar hugmyndir, efnisval og úrvinnsluaðferðir, enda byggja þau ýmist á handverki, myndlist eða hönnun. Oft skarast þó mörkin milli þessarra ólíku þátta og útkoman getur komið skemmtilega á óvart, að því er fram kemur í lýsingu.
Sýningarstjóri er Inga Þórey Jóhannsdóttir.
