Torfærubíó í Duushúsum á laugardag

Hreyfimyndir af torfærukeppnum og fleira sem Jónatan Ingimarsson tók upp á sjötta og sjöunda áratugnum verða sýndar á breiðtjaldinu í bíósal Duushúsa á laugardaginn, 7. desember, kl. 15:00. Myndirnar verða einnig á sýningu í Bíósalnum á sunnudeginum á meðan húsin eru opin.

Þetta áhugaverða efni sem Jónatan er að gefa Byggðasafninu bætir við góðu efni íþróttamynda sem safnað hefur verið um langt skeið með dyggri aðstoð Viðars Oddgeirssonar. Myndirnar sem eru um tvær og hálf klukkustund verða skilgreindar sem hluti af íþróttaminjasafni Reykjanesbæjar sem er í umsjón
byggðasafnsins.

Gestum Duushúsa er boðið að skoða brot af þessu efni í bíósalnum á laugardag og sunnudag á framangreindum tíma. Myndefnið hefur verið unnið upp af þeim Viðari og Jónatani. Meðal annars hefur tónlist verið sett með efninu sem Jónatan samdi og einnig tónlist eftir Vigni Bergmann.