Tónleikar um Elly Vilhjálms í Hljómahöll
- söngvaskáld á Suðurnesjum fara yfir feril Ellyjar
Söngdívan Elly Vilhjálmsdóttir verður til umfjöllunar á tónleikum Söngvaskálda á Suðurnesjum í Hljómahöll nk. fimmtudaginn 7. mars en þar verður sagt frá uppvexti hennar á Merkinesi í Höfnum og ævintýralegum söngferli.
Þá kemur við sögu samstarf hennar við bróður sinn Vilhjálm eða Villa Vill, einn ástsælasta söngvara þjóðarinnar en þau sungu saman lög inn á plötur sem löngu eru orðin að klassískum dægurlagaperlum.
Flytjendur eru að venju Dagný Maggýjar, Arnór B. Vilbergsson og Elmar Þór Hauksson og fara tónleikarnir fram í stofusettinu í Bergi, Hljómahöll, enda segjast flytjendur taka sig hæfilega alvarlega og mikilvægara sé að hafa gaman en hafa flutninginn fullkominn.
Miðasala er á hljomaholl.is
