Tónleikar í DUUShúsum í kvöld

Í kvöld kl. 20:00 verða haldnir tónleikar í Duushúsum í Reykjanesbæ. Þar leikur blásaraoktettinn Hnúkaþeyr efnisskrá með tónlist eftir Wolfgang Amadeus Mozart og Gordon Jacob.
Tónskáldin Mozart og Jacob eiga það sameiginlegt að vera báðir afar hrifnir af blásturshljóðfærum. Blásaraoktettar voru vinsælt form hjá hinum klassísku meisturum, enda er hljómurinn voldugur en jafnframt blæbrigðaríkur. Mozart skrifaði þrjár blásaraserenöður og á tónleikunum verður leikin sú í c-moll. Efnisskráin endurspeglar að nokkru leyti þær tónbókmenntir sem til eru því að frá klassíska tímanum verður að fara fram til 20. aldarinnar til að finna tónlist fyrir blásaraoktett. Divertimento í Es-dúr eftir Gordon Jacob er kryddað með nýjum hljómi og ómstríðum frá síðustu öld þar sem hornin fá að njóta sín. Hnúkaþeyr hefur tónleikana á að leika þekkt stef úr óperunni Brúðkaup Fígarós eftir Mozart.
Hnúkaþey skipa Peter Tompkins og Eydís Franzdóttir á óbó, Rúnar Óskarsson og Ármann Helgason á klarinett, Anna Sigurbjörnsdóttir og Emil Friðfinnsson á horn, Darri Mikaelsson og Kristín Mjöll Jakobsdóttir á fagott.
Tónleikarnir eru samstarfsverkefni Félags íslenskra tónlistarmanna, Tónlistarskóla Reykjanesbæjar og menningarfulltrúa Reykjaensbæjar með styrk frá Menntamálaráðuneytinu.