Tónfræðakeppnin Kontrapunktur á Degi tónlistarskólanna

Hinn árlegi Dagur tónlistarskólanna verður haldinn hátíðlegur laugardaginn 25. febrúar n.k. Löng hefð er orðin fyrir því að tileinka íslenskum tónlistarskólum síðasta laugardag febrúarmánaðar og er tilgangur þess dags er að vekja athygli á starfsemi tónlistarskólanna í landinu. Af því tilefni efna tónlistarskólar til margvíslegrar dagskrár fyrir almenning.

Í tilefni dagsins, þá stendur Tónlistarskóli Reykjanesbæjar, eins og í fyrra, fyrir keppni í tónfræðagreinum meðal nemenda skólans, ásamt þekkingu á hljóðfærum og almennri þekkingu í tónlist. Keppnin ber heitið Kontrapunktur og er það nafn fengið frá tónlistarkeppni, sem haldin var af norrænu sjónvarpsstöðvunum fyrir fáum árum.

Í keppninni að þessu sinni, verður tekið í notkun nýtt, sérsmíðað fjölborða bjöllukerfi til að nota í bjölluspurninga-flokknum.
Kontrapunktur er liðakeppni og er hvert lið skipað nemendum hvers tónfræðabekks í skólanum.

Keppnin fer fram á sal Fjölbrautaskóla Suðurnesja frá kl. 13-18 og keppt verður í 3 riðlum á eftirfarandi tímum:

1. riðill keppir kl. 13, 2. riðill keppir kl. 15, 3. riðill keppir kl.17.
Keppni í hverjum riðli stendur yfir í u.þ.b. klukkustund og fær hvert sigurlið veglega viðurkenningu fyrir frammistöðuna.

Allir eru hjartanlega velkomnir að fylgjast með keppninni.