Þrettándinn haldinn hátíðlegur í Reykjanesbæ

Þrettándagleði og álfabrenna verður haldin föstudaginn 6. janúar og hefst með skrúðgöngu frá Reykjaneshöll kl. 19:30.

Dagskrá hefst í Reykjaneshöll kl. 18:30 en þar verður boðið upp á andlitsmálun fyrir yngstu krakkana, leiktæki og heitt kakó.

Dagskrá á Iðavöllum hefst kl. 19:50 með álfabrennu, tónlist og söng. Álfakóngur og drottning mæta á staðinn ásamt Grýlu, Leppalúða, jólasveinum og ýmsum púkum.

Karlakór Keflavíkur, kvennakór Suðurnesja og Lúðrasveit Tónlistarskóla Reykjanesbæjar leika og syngja.

Flugeldasýning á vegum Björgunarsveitarinnar Suðurnes hefst kl. 20:20.

Flugvallarvegur verður lokaður á milli Sunnubrautar og upp á Reykjanesbraut ofan Iðavalla á milli kl. 18:30 og 22:00:

Minnt er á bílastæði við Fjölbrautaskólann, íþróttahúsið við Sunnubraut og Samkaup.