Þingmenn að smala atkvæðum í Þórkötlustaðarétt?

Beitarhólf Grindvíkinga var smalað til réttar á laugardaginn í einmuna blíðu. Tókst smölun í alla staði mjög vel og eru nánast fullar heimtur úr hólfinu. Réttað var á sunnudaginn í Þórkötlustaðarrétt og var fjöldi fólks samankomin til að upplifa réttarstemninguna.
Er það samdóma álit þeirra sem best þekkja að fé hafi komið vænt af fjalli og að beitarhólfið þjóni sínu hlutverki vel. Björn Haraldsson verslunarmaður og ábúandi í Auðsholti bauð gestum og gangandi kjötsúpu í stóru tjaldi sem reist hafði verið á bæjarhlaðinu og myndaðist góð stemning í tjaldinu.
Fleiri voru að smala um helgina því vel flestir þingmenn kjördæmissins voru mættir í Þórkötlustaðarrétt á sunnudaginn.