Þetta er lið Reykjanesbæjar í Útsvari

Fyrsta viðureign liðs Reykjanesbæjar í Útsvari, spurningakeppni sveitarfélaga á RÚV 2018-2019, verður föstudaginn 26. október nk. Liðið skipa þau Grétar Þór Sigurðsson nemi, Kristján Jóhannsson leiðsögumaður og leigubílsstjóri og Valgerður Björk Pálsdóttir verkefnisstjóri.

Fyrirkomulagi keppninnar hefur verið breytt. Nú munu einungis 12 sveitarfélög keppa, þau sem hafa unnið síðastliðin 11 ár, komst í úrslit eða farið mjög nálægt því. Að auki verða skipuðu fjögur óhefðbundin lið sem eiga að koma sjónvarpsáhorfendum á óvart. Keppniskvöld verða því átta á þessu hausti en úrslit fara svo fram eftir áramót.

Þær breytingar hafa verið gerðar á liðinu að Valgerður Björk Pálsdóttir verkefnastjóri kemur í stað Helgu Sigrúnar Harðardóttur lögfræðings sem þurfti frá að hverfa.

Reykjanesbær þakkar þessum glæsilegu fulltrúum fyrir þátttökuna og óskar þeim góðs gengis í vetur.