Svölurnar selja jólakort
- Safna fyrir Grensásdeild
Góðgerðafélag flugfreyja og flugþjóna, Svölurnar, hefur undanfarin ár selt jólakort og látið ágóðann renna til góðra málefna. Í ár verður engin undantekning á og eru jólakortin komin í sölu. Ágóðinn mun renna til Grensásdeildar. Hér á Suðurnesjum verða kortin seld í Álnabæ, á Nesvöllum, hjá HSS, Lyfju Krossmóa og hjá Lyfju í Grindavík.
Félagið var stofnað fyrir 43 árum síðan með það að markmiði að viðhalda vináttu sem myndast hefur í starfinu. Félagsmenn eru um 300. Í gegnum tíðina hafa Svölurnar styrkt ýmsa sem þurft hafa á hjálp að halda en ekki átt rétt á opinberum styrkjum, svo sem langveik börn með sjaldgæfa sjúkdóma.
Kortin í ár voru hönnuð hjá Prentmennti undir handleiðslu stjórnar Svalanna. Þau eru tvenns konar, hvít með bláum hnetti og rauð með gullnu jólatréi. Í tilkynningu frá Svölunum segir að þær voni að Suðurnesjamenn taki vel á móti þeim og styrki starfið vel líkt og undanfarin ár.
