Sumri fagnað með Latínsveit Tómasar R í kvöld
Í kvöld, föstudagskvöld, mun Tónlistarfélagið og Sparisjóðurinn sameinast um að fagna sumarkomunni með tónleikum Latínsveitar Tómasar R. Tónleikarnir verða haldnir í Bíósal Duus húsa og hefjast kl. 21:00. Léttar veitingar verða í boði Sparisjóðsins í hléi. Latínsveitin er að venju skipuð valinkunnum tónlistarmönnum sem Tómas R. Einarsson leiðir af sinni alkunnu snilld. Með honum verða Samúel J. Samúelsson á básúnu, Kjartan Hákonarson á trompet, Ómar Guðjónsson á gítar og Matthías M.D. Hemstock á trommur og slagverk.Efni tónleikanna er af geisladiskum Tómasar sem hafa verið tileinkaðir latíntónlist. Sá fyrsti, KÚBANSKA, kom út 2002. Disknum var vel tekið, hann fékk tvær tilnefningar til ÍTV og í bandaríska tímaritinu All About Jazz skrifaði C. Michael Bailey:“It´s a funny thing, all of this Latin Jazz coming from such remote places. But when it´s played that well, who cares?”
Árið 2003 hélt Tómas til Havana og hljóðritaði nýtt efni með kúbönskum tónlistarmönnum. Tveir þeirra komu svo til Íslands um haustið og fóru í tónleikaferð með hljómsveit TRE. Geisladiskurinn HAVANA hlaut góðar móttökur og tvenn verðlaun í djassflokki ÍTV. Tónlistargagnrýnandi New York Times, Peter Watrous, lofaði diskinn á helsta veftímariti latíntónlistarinnar, DESCARGA (“A pure descarga pleasure”).
Latínsveit TRE hefur spilað vítt og breitt um landið á síðustu árum auk þess að hafa leikið á Djasshátíðinni í Thorshávn 2004, Kongsberg Jazz Festival, einni elstu og virtustu djasshátíð Evrópu, 2005, og árið 2006 lék hún bæði á helsta djassklúbbi Moskvuborgar, Le Club, og hélt útgáfutónleika í því sögufræga húsi Casa de la Amistad í Havana.
ROMM TOMM TOMM var hljóðrituð í Reykjavík og Havana í mars og apríl 2006. Þar fléttar TRE saman leik íslenskra og kúbanskra tónlistarmanna í músík sem sækir jöfnum höndum í íslenska tónlistarhefð og kúbanska. ROMM TOMM TOMM fékk afbragðs viðtökur hérlendis, jafnt hjá gagnrýnendum og plötukaupendum, og erlendis hafa birst um diskinn lofsamlegir dómar, m.a. í El Habanero á Kúbu (“Kraftmikil tónlist, frábærlega spiluð”) og í bandaríska veftímaritinu Descarga.com (“Fagur og undarlegur tónlistarbræðingur”)
Latíndiskar TRE hafa nú selst samtals í sjö þúsund eintökum, að stærstum hluta á Íslandi. Þeir verða “gefnir út” á i-tunes, í yfir tuttugu löndum, á tímabilinu maí til júlí og hið þekkta bandaríska fyrirtæki Putumayo World Music hefur valið eitt lag af geisladisknum HAVANA á safnplötuna Latin Jazz, sem kemur út 26. júní.
