Sumarspjallið: Hvasst á daginn og logn á kvöldin

Davíð Arthur Friðriksson er nýkrýndur klúbbmeistari Golfklúbbs Grindavíkur. Ekki nóg með það heldur er hann nýbakaður faðir í þokkabót en hann og Dagmar Lóa kona hans eignuðust dreng nú í júlí. Davíð Arthur starfar sem slökkviliðsmaður hjá Isavia á Keflavíkurflugvelli.

Hvernig hefur sumarið verið hingað til hjá þér?

„Bara flott, við eignuðumst dreng í júlí og ég varð klúbbmeistari GG í golfi í síðustu viku. Það var líka mikil upplifun að fara austur á Kirkjubæjarklaustur í hreinsunarstörf með slökkviliðinu.“

Hvað fer á grillið hjá þér?

„Kjúklingarbringur í BBQ og stór og mikil kartafla.“

Á að ferðast eitthvað innanlands í sumar?

„Nei ekkert svoleiðis, þó aldrei að vita nema að maður labbi upp á Esjuna í fyrsta sinn.“

En erlendis?

„Já ég er að fara á Heimsleika Slökkviliðsmanna í águst til New York að keppa í Ultimate Firefighter.“

Hvað á annars að gera í sumarfríinu?

„Njóta þess með fjölskyldunni og spila golf. Ekki má gleyma að spila fótbolta í utandeildinni með FC Keppnis.

Er eitthvað sem er einnkennandi fyrir íslenskt sumar að þínu mati?

„Það er hvasst á daginn og logn á kvöldin.“

Hvað á að gera um verslunarmannahelgina?

„Ekkert. Hjálpa tengdó með gistiheimilið og kannski kíkjum við eitthvað á rúntinn, hvað er langt til Eyja?“