Sumarliði færist nær stjörnunum

Keflvíkingurinn Sumarliði Þorsteinsson gengst núna undir loka prófraun sem sker úr um það hvort hann sé hugsanlega á leið út í geiminn. Sumarliði sem búsettur er í Svíþjóð þar sem lokaprófið fer fram, hefur í sumar hefur verið í markvissri þjálfun hjá Suðurnesjatröllinu, Sævari Borgars. „Hann hefur pískrað mig áfram og það er algerlega honum að þakka að ég er að fara að standast þolprófið,“ sagði Sumarliði í samtali við VF.

Sumarliði er ákaflega spenntur eins og gefur að skilja en um helgina fer fram þríþætt próf í Svíþjóð þar sem 12 keppendur gangast undir.  Fyrst er um að ræða minnispróf, svo lógíst þrautarpróf og loks þolpróf.

..Hvað minnisprófið varðar, þá er ég ekki beinlínis skarpasti hnífurinn í skúffunni þegar kemur að því að muna hluti, en alls ekkert vonlaus. Fyrir lógíska þáttinn þá tel ég mig vera þokkalega heilsteyptann í hausnum. Svo þolprófið mikla sem ég er hvað mest undirbúinn fyrir þökk sé Sævari.“

Nú er Sumarliði staddur í Svíþjóð en þar sigraði hann örugglega í netkosningu í vor sem tryggði honum í 12 manna úrslit. Sigurvegara þrautanna verður svo boðið til Flórída í Kennedy Space Center í alvöru geimfaraþjálfun. Um alþjóðlega keppni er að ræða og fer hún fram í um 60 löndum. Alls eiga 22 einstaklingar tækifæri á því að komast upp í geim þannig að nú verður spennandi að sjá hvort draumur Sumarliða rætist.

VF myndir EJS.