Suðurvellir í samstarf við Íþróttaakademíuna

Heilsuleikskólinn Suðurvellir í Vogum hefur tekið upp samstarf við Íþróttaakademíuna um vettvangsnám íþróttakennaranema.

Það felur í sér að nemendur við akademíuna koma og vinna með börnunum, en á Suðurvöllum er einmitt lögð áhersla á heilsusamlegt mataræði og hreyfingu. Þar starfar einnig íþróttakennarinn Baldvin Júlíus Baldvinsson.

Fyrsti neminn var við störf í síðastliðinni viku, en þar var Jón Norðdal Hafsteinsson, sem er einnig þekktur fyrir körfuknattleiksiðkun, en í næsta mánuði kemur annar og svo koll af kolli.

Fulltrúar leikskólans segja þetta verkefni afar ánægjulegt innlegg í starfið og góða tengingu milli háskóla og leikskólastarfs á svæðinu.

Mynd/vogar.is: Jón með börnunum á Suðurvöllum