Suðurnesin góður jarðvegur fyrir listafólk

Keflvíkingurinn og verkfræðingurinn Guðgeir Arngrímsson var orðinn frekar leiður á einhæfu skrifstofustarfi hjá Advania þegar vinur hans hafði samband við hann og bauð honum að gera með sér kvikmynd. Myndin er sú fyrsta sem fjármögnuð er í gegnum hópfjármögnunarsíðuna Karolina Fund. Listagyðjan hefur lengi togað í Guðgeir, sem var liðsmaður hljómsveitarinnar Elope, þegar hann var 14 til 16 ára. Hann segir Suðurnesin góðan stað til að ala upp listafólk. 

Guðgeir er fæddur í Keflavík 1987 og bjó þar frá 6 ára til 16 ára aldurs, þegar hann flutti til Ísafjarðar. „Pabbi varð vinnslustjóri frystihússins á Þingeyri og þá flutti fjölskyldan vestur. Það var gott að búa í Keflavík, sérstaklega því þar er svo góður jarðvegur fyrir listafólk að blómstra. Ég söng og spilaði á gítar í hljómsveitinni Elope frá 14 til 16 ára. Þá kviknaði áhuginn á því að gera eitthvað óhefðbundið; elta einhvers konar drauma og gera eitthvað skapandi,“ segir Guðgeir og bætir við að hann hafi oft minnst á það við fólk hversu góð aðstaða er fyrir hljómsveitir og list almennt á Suðurnesjum. „Árangurinn er líka eftir því. Meira og minna Suðurnesjamenn eru í bestu nýju hljómsveitum á landinu.“

Hætti við ‘réttu’ leiðina í lífinu

Snævar Sölvason leikstjóri ákvað að æða út í að gera bíómynd í fullri lengd í stað þess að slægja fisk enn eitt sumarið. „Hann byrjaði að skrifa hana vorið 2013, var búinn með eitt ár í kvikmyndaskólanum og hafði gert aðra mynd, svona upp á flippið og selt innanbæjar í Bolungarvík,“ segir Guðgeir, en þeir félagar kynntust í Menntaskólanum á Ísafirði og fóru síðar báðir í verkfræði. „Við ætluðum að fara þessa ‘réttu’ leið í lífinu; ná í góða menntun, trausta vinnu, hús og fjölskyldu. Við fundum okkur ekki í því.“

Aðalsöguhetjan Tommi eltir ástina vestur á firði.

Þriðjungur kostnaðar tryggður

Guðgeir og Snævar kláruðu handritið í sameiningu og Guðgeir gerðist meðframleiðandi í öllu ferlinu og aðstoðarleikstjóri á setti, sem er n.k. verkstjóri. „Ég sé ekki eftir því að hafa sagt upp vinnunni til að láta þennan draum rætast. Það er mjög gaman að gera eitthvað nýtt á hverjum degi og leysa öll vandamál sjálfur. Hjá Advania var mikil einhæfni og unnið eftir gæðakerfi. Mér líður líka betur í umhverfi sem er ekki staðlað.“ Myndin heitir Albatross og um þrjár vikur eru til stefnu á Karolina Fund með að fjármagna hana. Búið er að tryggja þriðjung kostnaðar en markmiðið er 20 þúsund Evrur. 

Leikstjórinn a gantast við Pálma Gestsson og Guðmund Kristjánsson milli taka. 

Strákarnir velta fyrir aðstæðum til svifvængjaflugs við gömlu ratsjárstöðina á Bolafjalli.

Ást, golf og metnaðarfullur yfirmaður

Gamanmyndin Albatross segir frá Tómasi, ungum og ástföngnum manni sem ákveður að leggja framtíðarplönin á hilluna til að elta kærustu sína vestur á firði þar sem hann ræður sig í sumarvinnu hjá Golfklúbbi Bolungarvíkur. Ekki beint það sem hann hafði hugsað sér eftir háskólanám en ástin spyr hvorki um stað né stund. Á golfvellinum í Bolungarvík kynnist hann ansi skrautlegum samstarfsmönnum og virkilega metnaðarfullum yfirmanni sem þráir ekkert heitara en að fá stórmót á golfvöllinn í Bolungarvík. Tómasi líst ekki á blikuna en gerir það fyrir hina einu sönnu. Svo dynja áföllin yfir. Með stærstu hlutverk í myndinni fara Ævar Örn Jóhannsson, Finnbogi Dagur Sigurðsson, Gunnar Kristinsson, Guðmundur Magnús Kristjánsson, Birna Hjaltalín Pálmadóttir og faðir hennar, Pálmi Gestsson. „Framleiðslan nú á lokametrunum. Öllum tökum er lokið og framundan er kostnaðarsamt eftirvinnsluferli. Ef við náum kostnaðinum með Karolina Fund verður Albatross fyrsta leikna kvikmyndin sem fjármögnuð er í gegnum síðuna,“ segir Guðgeir stoltur og hvetur alla til að elta draumastarfið. „Það er ekki auðvelt en það er einmitt þess vegna sem það er þess virði."

Smákóngurinn Kjartan (Pálmi Gestsson) les yfir hausamótunum á strákunum. 

Sólin var hópnum hliðholl þetta sumarið og flestir fengu smá lit.

VF/Olga Björt