„Stundum tek ég myndir út í bæ og líka stundum út í skrúðgarði“

-segir Salka Björt Kristjánsdóttir 5 ára ljósmyndari úr Njarðvík


Salka Björt Kristjánsdóttir hefur tekið ljósmyndir í Reykjanesbæ í vetur og hefur hún valið myndefnið sjálf í gönguferðum sínum. Myndirnar hefur hún tekið á sjálfvirka stafræna myndavél, en hún er að læra á myndavél þar sem stilla þarf fókusinn.
Salka Björt er mjög ákveðin ung stúlka og þegar blaðamaður tók hús á henni í Njarðvík á dögunum, átti hún ekki í neinum vandræðum með að útskýra myndirnar sem hún hefur tekið í vetur. Það er verulega gaman að sjá hvernig hún hefur valið myndefni og sérstaklega þegar maður hefur það í huga 5 ára börn eru ekki há í loftinu og afstaða myndanna mótast að sjálfsögðu af því. Í viðtali við Ljósanæturblað Víkurfrétta segist Salka hlakka til að sjá ljósmyndasýninguna sem verður í húsakynnum Bókasafns Reykjanesbæjar. Sýningin verður formlega opnuð kl. 16 fimmtudaginn 4. september og verður hún opin alla Ljósanæturdagana. Á sýningunni verða á milli 20 og 30 myndir sem rúlla yfir tölvuskjá til kl. 18:00 laugardaginn 6. september.

Ert þú að fara að halda ljósmyndasýningu?
Já.

Tekurðu mikið af ljósmyndum?
Já.

Er eitthvað sérstakt sem þú tekur myndir af?
Stundum tek ég myndir út í bæ og líka stundum út í Skrúðgarði.

Hverju finnst þér skemmtilegast að taka myndir af?
Bara af einhverjum hundum og einhverju fólki.

Áttu einhverja uppáhaldsmynd?
Já, það er mynd sem ég tók af krulluðum hundi. Það er uppáhaldsmyndin mín.

Verður hún á sýningunni?
Já.

Hlakkar þú ekki til að sjá sýninguna á Ljósanótt?
Jú.

Ertu lengi að velja það sem þú ætlar að taka mynd af?
Nei, ég er fljót að því.

Ætlarðu að verða ljósmyndari þegar þú verður stór?
Já, ég ætla að verða ljósmyndari.

VF-ljósmynd: Salka Björt, ungi ljósmyndarinn úr Njarðvík í herberginu sínu.