Stórtónleikar Þóris Baldurssonar í kvöld

Stórtónleikar Þóris Baldurssonar með Stórsveit Reykjavíkur verða í Ráðhúsi Reykjavíkur í kvöld, mánudaginn. 29. mars 2004, kl. 20:00 í tilefni 60 ára afmælis Þóris Baldurssonar. Þóri Baldursson er í raun óþarfi að kynna fyrir landsmönnum, en hann hefur staðið fremstur í flokki íslenskra tónlistarmanna í áratugi. 
Að telja upp allan þann fjölda verkefna á tónlistarsviðinu sem Þórir hefur skilað af sér yrði langur listi. Ókeypis aðgangur verður að tónleikunum svo lengi sem húsrúm leyfir.
Sérstakir gestir verða:  Hljómar (Gunnar Þórðarson, Rúnar Júlíusson, Engilbert Jensen og Erlingur Björnsson), Andrea Gylfadóttir, Savanna-tríóið: Troels Bendtsen, Björn G. Björnsson og Björgvin Halldórsson.


Stutt ferilsyfirlit Þóris Baldurssonar:

· Fæddur í Keflavík 29. mars 1944. Byrjaði ungur að spila á harmonikku með föður sínum sem einnig lék á harmonikku á dansleikjum í Ungó í Keflavík.
· Hóf feril sinn sem atvinnutónlistarmaður 1958. Það var með hljómsveit Guðmundar Ingólfssonar, sem lék í “Krossinum” um helgar og oft á vellinum í miðri viku. Lék þá eingöngu á píanó.
· Savanna-tríóið var stofnað 1962 og starfaði óslitið til ársins 1967. Í því spilaði ÞB á gítar. Tríóið naut geysi vinsælda og fór um allt land að skemmta landsmönnum. Savanna-tríóið var með skemmtidagsskrá í íslenska sjónvarpinu fyrsta kvöldið sem það hóf útsendingar sínar 1966. Tríóið gerði fleiri þætti fyrir sjónvarpið og urðu því andlit meðlima þess góðkunningjar allra landsmanna. Komu þeir meðal annars fram í breska sjónvarpinu fyrir tilstilli Magnúsar Magnússonar fjölmiðlamanns. Plötualbúm þeirra félaga, sem þeir gerðu fyrir SG-hljómplötur, seldust í stórum upplögum og seljast enn.
· Lauk námi úr kennaradeild Tónlistarskólans í Reykjavík 1965
· Flutti til meginlands Evrópu 1970. Starfaði með ýmsum hljómsveitum í Svíþjóð, Sviss og Þýskalandi. Settist að í Munchen 1972 og starfaði þar sem sessionmaður, útsetjari og pródúsent á ótal upptökum fyrir listamenn hvaðanæva úr hinum vestræna heimi. Má þar telja þekkt nöfn eins og: Elton John, Donnu Summer, Grace Jones, Melbu Moor, Boney M og La Bionda ásamt fjölda þýskra listamanna svo sem Ralph Siegel, Amon Duhl, Kurt Edelhagen og Hans Hammerschmidt svo einhverjir séu nefndir.
· Til Bandaríkjanna 1980 að starfa fyrir útgáfufyrirtækin Salsoul, Casablanca og Molton Music. Þessi fyrirtæki notuðu hljóðver í New York, Los Angeles og Philadelphia svo sem hið þekkta Sigma Sound. Árin 1987 – 1990 fóru eingöngu í útsetningar, tónsmíðar og session-spilamennsku í R&B tónlist fyrir Lionel Job Inc. og Hardindur Music í New York og San Francisco.
· Árið 1982 kom ÞB til Íslands og starfaði með hljómsveitinni Geimsteini um skeið. Hann kynntist þá eiginkonu sinni Guðrúnu Pálsdóttur. Þau eiga saman tvær dætur: Sóleyju og Sunnu Margréti. Áður hafði Þ eignast soninn Björn með fyrrverandi konu sinni Rannveigu Ólafsdóttur og einnig eru börnin Christian Thor og Carina sem búa í Stokkhólmi. Þau fæddust í Munchen meðan Þ var giftur sænsku söngkonunni Ninu Lizell.
· Alkominn heim til Íslands 1990, hóf Þ störf sem kennari við Tónlistarskóla FÍH. Þar kennir hann jazzpíanó og nótnaskrift með tölvu. Auk þess að spila fyrir matargesti Perlunnar er Þ nýskipaður hljómborðsleikari hljómsveitarinnar “Brimkló” þar sem Björgvin Halldórsson er í broddi fylkingar. Þórir starfar enn mikið við útsetningar af öllu tagi fyrir allar tegundir hljómsveita, allt frá Sinfóníuhljómsveit Íslands, kóra, Lúðrasveit og Stórsveit Reykjavíkur til rokk og popphljómsveita. Af samstarfi þeirra félaga, Björgvins og Þóris hefur orðið til fjöldi diska sem heyra má svo til daglega á öldum ljósvakans. Ekki má gleyma samstarfi Þóris og Rúnars Júlíssonar sem hefur verið stöðugt allt frá tímum “Lónlí Blú Bojs”. Næstum árlega frá miðjum áttunda áratugnum hefur einhver afurð frá Rúnari og Þóri, litið dagsins ljós í formi tónlistar.