Stórtónleikar í Garðinum í kvöld

Stórtónleikar verða í samkomuhúsinu í Garði í kvöld, Sumardaginn fyrsta. Þeir eru í tilefni af afhendingu og vígslu konsertflygils sem fjölmörg fyrirtæki og einstaklingar í Garðinum og á Reykjanesi gefa unglingaráði Víðis og bænum og hefjast þeir kl. 20:30.

Á tónleikunum kemur fram landslið stórsöngvara og einleikara:
· Sigrún Hjálmtýsdóttir, sopran
· Jóhann Friðgeir Valdimarsson, tenór
· Ólafur Kjartan Sigurðarson, baryton
· Davíð Ólafsson, bassi 
· Jónas Þórir, píanóleikari
· Þorsteinn Gauti píanóleikari mun leika einleiksverk á flygilinn

Auk þess mun ungt fólk í Garðinum koma fram.

Annað eins lið stórsöngvara hefur ekki komið fram í Garðinum áður og reyndar sjaldgæft að slíkt einvalalið komi fram úti á landsbyggðinni. 

Enginn aðgangseyrir er á tónleikana og allir velkomnir svo lengi sem húsrúm leyfir.

Mynd/Þorgils: Diddú, sem sést hér á tónleikum í Duus-húsum, er meðal einvalaliðs listamanna sem koma fram á tónleikunum.

 

Af heimasíðu Garðs