Steinunn stendur í ströngu

Nýtt Kastljós hefur göngu sína í kvöld á Ríkissjónvarpinu kl. 19:35. Meðal þáttarstjórnenda er Keflavíkurmærin Ragnhildur Steinunn Jónsdóttir. Ásamt því að stunda fullt nám verður Steinunn í Kastljósinu í vetur og á sviðinu með Sveppa í sýningunni Kalli á Þakinu. Þegar Víkurfréttir náðu tali af Steinunni í dag var hún að flýta sér úr Háskólanum og upp í Efstaleiti.

Hvert verður þitt hlutverk í nýja Kastljósinu?
Í heildina eru hlutverk okkar allra nokkuð fjölbreytt og við megum fjalla um allt milli himins og jarðar svo framarlega sem Þórhallur, ritstjóri, samþykkir það. Mitt hlutverk í kvöld er að opna þáttinn með Þórhalli. Það skemmtilega við vinnuna er hvað hópurinn er mismunandi og maður lærir mikið af hinum sem eru með manni í þessu. Ef ég kem með góða hugmynd þá fæ ég að afla mér upplýsinga um hana og vinna frekar í málinu.

Hvernig gengur að sameina námið, Kastljósið og Kalla á þakinu?
Það gengur erfiðlega, Haukur Ingi, kærastinn minn, stendur eins og klettur við bakið á mér og það er mjög mikilvægt. Undirbúningsvinnan við nýja Kastljósið hefur verið mikil og álagið því gífurlegt að undanförnu. Það er að komast fast form á þáttinn og við erum hvert og eitt farin að vinna að okkar efni. Þetta var bara svo gott tækifæri og ég greip gæsina á lofti.

Ertu með einhver önnur járn í eldinum sem þú villt segja okkur frá?
Ekki að svo stöddu og tíminn er af skorunum skammti með þau verkefni sem eru í gangi núna. Þannig að núverandi verkefni verða að duga.

Suðurnesjamenn, ásamt landsmönnum öllum, geta séð Steinunni og félaga í nýju Kastljósi í kvöld kl. 19:35 á Ríkissjónvarpinu.