Starfsfólk biskupsstofu í kynnisferð um Suðurnes

Biskup Íslands, hr. Karl Sigurbjörnsson, kom við í Hvalsneskirkju á föstudaginn ásamt starfsfólki biskupsstofu.

Þorvaldur Karl Helgason, biskupsritari og fyrrum sóknarprestur í Njarðvík, var með í ferðinni og sagði hann, í samtali við Víkurfréttir, ferðina hafa verið frábæra.
„Við förum alltaf í ferðalag saman á haustin til að hrista hópinn saman. Það er afar gaman að fara á staði sem maður hefur verið að fjalla um í vinnunni og kynnast þeim í návígi.“

Ferðalangar hlutu gott veður í bland við góðar móttökur og var allt eins og best var á kosið. „Við fengum leiðsögn frá Herði Gíslasyni, en Upplýsingamiðstöð Reykjaness benti okkur á hann. Hörður fræddi okkur um kirkjuna og hennar nánasta umhverfi og var afar fróðlegt að hlusta á hann.“

Hópurinn fór víða á ferð sinni og kom meðal annars við hjá Tómasi Knútssyni, foringja Bláa Hersins, og kynnti sér starfsemi þeirra. Þá enduðu þau í kaffiboði í Innri-Njarðvík en móttökurnar voru með eindæmum hvert sem þau fóru.