Smári verður Gudmundson
Nýtt nafn og lag - afmælistónleikar Klassart í haust
Sandgerðingurinn Smári Guðmundsson hefur sent frá sér nýtt lag undir nafninu Gudmundson. Smári er best þekktur sem gítarleikari og lagahöfundur hljómsveitarinnar Klassart. Lagið kallast Jaðarbúinn 1. hluti og sendi Smári frá sér myndband við lagið sem hann og Jón Marínó skrifuðu saman, en Jón sá um að vinna myndbandið og myndatöku.
Smári segir að þarna sé á ferðinni nýtt listamannanafn en meginmarkmið Gudmundson er að skapa aðstæður fyrir heimsfrið. „Láta mér og öðrum í kringum mig líða vel og komast í snertingu við grunnorku mína. Fyrsta skrefið er innri friður og samkennd.,“ segir Smári í snörpu spjalli við VF. Smári hefur einnig verið að undirbúa tíu ára afmæli fyrstu plötu Klassart, Bottle of blues. Í haust verður blásið til tónleika í Hljómahöll í tilefni af útgáfuafmælinu og verður platan endurútgefin á vínyl. Smári hefur í nægu að snúast en hann sótti m.a. nám í hljóðfræði í Tækniskólanum í fyrra, en hann dreymir um að semja kvikmyndatónlist í nánustu framtíð.
