Skvísurnar hans Grettis í Frumleikhúsinu

Það er geysivinsælt í framhaldsskólum að setja upp söngleiki. Dæmi eru jafnvel um að nemendur velji sér ákveðna framhaldsskóla sem eru frægir fyrir það að setja upp metnaðarfullar leiksýningar. Fjölbrautaskóli Suðurnesja ætlar ekki að láta sitt eftir liggja núna og í samstarfi við Leikfélag Keflavíkur verður söngleikurinn Grettir frumsýndur í Frumleikhúsinu föstudagskvöldið 15. mars. Það er reyndar leiklistarklúbburinn, Vox Arena í FS, sem er formlega í samstarfinu en nýtur stuðnings skólayfirvalda. Vox Arena hefur áður sett upp leiksýningar en aldrei í þessum stærðarflokki sem nú er í vændum. Sýningin er "grand" eins og einhver orðaði það og gefur hinum framhaldsskólasýningunum ekkert eftir.
Við tókum nokkra leikara tali og spurðum þá spjörunum úr;
Hildur Bjarney Torfadóttir er 20 ára Keflvíkingur og vinnur í Hagkaup. Hún leikur Sif gengispíu. "Ég var dregin hingað af Höllu Sverris sem vinnur með mér en hún hefur oft leikið með LK. Mér og vinkonu minni langaði að prófa eitthvað nýtt og ákváðum báðar að slá til. Ég hef aldrei áður leikið!", segir Hildur.
Brynja Dögg Jónsdóttir er 18 ára Sandgerðingur og er nemi við FS. Hún leikur Breddu gengispíu. "Mig hefur alltaf langað til að leika í svona stórri sýningu," segir Brynja, "og greip tækifærið þegar það gafst. Ég vissi eiginlega ekki hvað ég var að fara út í. Það var búið að vara mig við vinnunni sem fylgir þessu en maður neyddist bara til að skipuleggja tíma sinn betur. Ég á örugglega eftir að sakna þessarar vinnu og félagsskaparins þegar þetta er allt búið."
"Mér finnst sjálfstraustið hafa aukist alveg rosalega við þetta," segir Hildur brosandi,"og ég hefði aldrei trúað því að ég ætti eftir að þora þessu. Þetta er rosalega gaman og gefandi. Hópurinn er skemmtilegur og maður er búinn að kynnast fullt af nýju fólki. Öllum er tekið eins og þeir eru."
Þær segjast báðar vera búnar að eignast fullt af nýjum vinum og horfa svo hvor á aðra og segjast ekkert hafa þekkst áður en þær tóku þátt í söngleiknum. Þær eru farnar að hlakka til frumsýningarinnar en þær eru líka aðeins kvíðnar sem þær segja bara eðlilegt. Þær vonast eftir frábærri aðsókn svo þær fái að sýna sem oftast! Allir í Frumleikhúsið!