Sigríður sýnir í Hringlist

Sigríður Rósinkarsdóttir hefur opnað sýningu á vatnslitamyndum í Gallerý Hringlist, Hafnargötu 29 í Keflavík. Sýningin stendur til 27. október.
Sigríður er fædd að Snæfjöllum við Ísafjarðardjúp. Hún stundaði nám við myndlistardeild Baðstofunnar í Keflavík hjá Eiríki Smith. Sigríður hefur haldið margar einkasýningar, m.a. á Suðurnesjum, Hveragerði og Hrafnseyri við Arnarfjörð.
Síðasta einkasýning Sigríðar var í Stöðlakoti í Reykjavík um síðastliðna páska. Sú sýning fékk mjög góða dóma og sagði Halldór Björn Runólfsson í Morgunblaðinu m.a. „Bestu myndir Sigríðar eru án efa þær myndir sem hún leyfir sér að vinna á smáan flöt því þar fær flæðið mest frelsi til að móta fyrirmyndina”, og enn fremur „nálægðin og innileikinn skiptir því miklu máli í myndgerð Sigríðar... það er einmitt látleysið í óði Sigríðar til landsins sem gefur sýningu hennar gildi”.
Sigríður hefur einnig tekið þátt í nokkrum samsýningum bæði hér heima og erlendis. Hún sýndi t.d. í boði International Art Exchanging í Gallery Newform í Sparreholm 1997 og í Frolunda Kulturhus í Gautaborg 1998. Sigríður er félagi í norræna vatnslitafélaginu.