Reykjanesbær sigraði baráttu bæjarfélagana

Það var aldeilis hamagangur í öskjunni á Flughóteli á laugardaginn þegar bæjarfélög Suðurnesja öttu kappi í skemmtilegri hugvits og hönnunarkeppni. Liðin þurftu að leysa tvær þrautir þar sem unnið var með matvörur og reyndi sérstaklega á útsjónarsemi og samvinnu keppenda. Í fyrri þrautinni þurfti að byggja bíl út grænmeti og ávöxtum og átti farartækið að komast sem lengsta vegalenda á sérstakri braut. Bíll Reykjanesbæjar fór lengst en útlitið á bílunum var ansi skrautlegt og augljóslega margir efnilegir hönnuðir meðal keppenda. Fjórir kjörnir fulltrúar voru mættir til leiks frá hverju sveitarfélagi nema frá Sandgerði sem boðaði forföll.

Í næstu keppnisgrein þurftu keppendur að koma eggi heilu og höldnu niður af svölum 1. hæðar hótelsins og fékk hvert lið tvö egg til verksins. Hjálpartæki voru m.a.: grillpinnar, teygjur, bómull, rafmagnsvír og ýmislegt fleira. Liðin þurfu að útbúa umgjörð utan um eggið til að koma því heilu og höldnu niður. Haldið var uppboð á hlutunum en hvert lið um sig fékk 75 eldspýtur sem gjaldmiðil. Fast var skotið milli liða og myndaðist mikil stemning í uppboðinu, enda átti það eftir að skipta sköpum í framhaldinu.

Egg Reykjansbæjar fór í heilu lagi niður og því var ljóst að sigurinn var þeirra.

Kynnir var Kristján Jóhannsson sem tók sér frí frá glimmer og gaddavír og fór alveg hreint á kostum. Aðstandendur keppninnar vonast til að framvegis verði slík keppni haldi um hverja Ljósanæturhelgi enda tókst vel til.

Myndasafn frá keppninni má sjá hér.