Rafsuða og óperusöngur

Ljósmyndari Víkurfrétta kíkti á æfingu hjá Norðurópi. Stemningin var létt og skemmtileg og það verður spennandi að sjá hver útkoman verður því æfingarnar lofa svo sannarlega góðu. Sviðsmyndin verður komin upp innan fárra daga en frumsýningardagur er föstudagurinn 10. ágúst.

Mynd: Garðar Cortes stjórnar tónlistarflutningi af sinni alkunnu snilld.Verkin sem sýnd verða eru tvö, Gianni Schicchi eftir Puccini og Requiem eftir Sigurð Sævarsson en þau taka um 50 mínútur hvort. „Æfingarnar ganga prýðilega“, sagði Jón Páll Eyjólfsson, leikstjóri Gianni Schicchi þegar Víkurfréttir höfðu samband við hann þar sem hann var við vinnu í Dráttarbrautinni. Leikstjórinn var þar í óðaönn að hjálpa til við uppsetningu leikmyndar. „Það er líf og fjör hérna í dag, við erum á fullu að rafsjóða og setja upp ljósaslá.“ Fram að frumsýningu verða æfingar á hverju einasta kvöldi. „Þetta er mjög öflugur hópur, blanda af nýjum söngvurum og öðrum sem hafa meiri reynslu“, segir Jón Páll. „Það þarf alveg sérstakan hóp til að takast á við svona ögrun. Við erum að breyta dráttarbraut og bílaþvottastöð í óperuhús.“
Í Nýja tónlistarskólanum í Reykjavík var kórinn við æfingar. „Þetta gengur mjög vel“, segir Sigurður Sævarsson tónskáld og hljómsveitarstjóri. „Við erum á fullu að safna hljóðgervlum og setja upp hljóðkerfi fyrir sýningarnar.“ Æfingar kórsins í Keflavík hófust í þessari vikur en samhliða þeim fara fram æfingar á Z-ástarsögu í Reykjavík. Það er því nóg að gera hjá aðstandendum Norðuróps en áhugi á sýningunum er mjög mikill, bæði á Suðurnesjum og annarsstaðar. „Okkur hafa borist margar fyrirspurnir auk þess mikið hefur verið um pantanir. Ég vil hvetja fólk, sem hefur áhuga á sýningunum, að panta miða sem fyrst. Það verður mikil ásókn á sýningarnar“, segir Sigurður. Miðar eru seldir í Sparisjóðnum í Keflavík og í síma 421-6623. „Þetta er líklega stærsti menningarviðburður sem settur hefur verið upp á Suðurnesum.“