Ræddu flugslys í sagnastund

Þorsteinn Marteinsson var gestur sagnastundar á Garðskaga síðasta laugardag. Þorsteinn hefur ásamt Ólafi bróður sínum safnað saman ómetanlegum heimildum um 160 flugslys og flugóhöpp sem urðu á Íslandi í síðari heimstyrjöldinni. Efninu hafa þeir safnað á vefsvæðið stridsminjar.is.

Fjölmörg flugóhöpp urðu á Reykjanesskaganum og sum þeirra mannskæð. Eitt „frægasta“ flugslysið varð í Fagradalsfjalli þann 3. maí 1943 þegar bandarísk sprengjuflugvél af gerðinni B-24D Liberator sem bar heitið „Hot Stuff“ fórst í fjallinu. Flugvélin var á leið heim til Bandaríkjanna í fyrirhugaða sigurför sem fyrsta sprengjuflugvélin sem hafði náð ósködduð að fljúga 25 árásarferðir frá Bretlandi yfir meginland Evrópu í seinni heimsstyrjöldinni. Þorsteinn sagði frá þessu slysi og minnisvarða sem reistur var og afhjúpaður fyrir fimm árum.

Hér að neðan má sjá upptöku frá sagnastundinni og virða fyrir sér myndir.