Plokkað í Reykjanesbæ á laugardag

Stóri plokkdagurinn í Reykjanesbsæ fer fram laugardaginn 25. apríl. Reykjanesbær og Blái herinn hafa tekið höndum saman og sett markmiðið á að vel takist til með að hreinsa bæjarfélagið, segir á heimasíðu Reykjanesbæjar.

Til að auðvelda skipulagningu dagsins hafa starfsmenn Umhverfissviðs og Blái Herinn skipt Reykjanesbæ upp í fjögur svæði og er tilgangur með skiptingunni er að á þessum svæðum eru tilgreind söfnunarsvæði. Íbúum er auðvitað velkomið að flakka á milli svæða.

Söfnunarstaðir í Reykjanesbæ eru eftirfarandi:

Blár (Keflavík/Njarðvík) = Fyrir framan Reykjaneshöll
Gulur (Innri Njarðvík) = Akurskóli
Fjólublár (Ásbrú) = Leikskólinn Völlur
Hafnir - Félagsheimilið

Við hvetjum íbúa og starfsmenn Reykjanesbæjar til að taka þátt í STÓRA PLOKKDEGINUM og jafnvel taka vikuna í þetta enda hjálpar það eflaust til við að virða tveggja metra regluna og um leið má koma í veg fyrir hópamyndun.

Plokk á Íslandi bendir á nokkur góð heilræði fyrir helgina:

Frábær hreyfing fyrir alla aldurshópa
Hafa hanska, plokkur og ruslapoka við höndina meðan á plokki stendur
Klæða sig eftir aðstæðum
Virðum tveggja metra regluna

Blái herinn mun dreifa sekkjum á söfnunarstaði þar sem plokkarar geta komið frá sér ruslinu sem plokkað er. Starfsmenn Reykjanesbæjar og Blái herinn munu svo tæma og fjarlægja sekkina þegar átakið er búið.