Opnar nýjan bar í Reykjanesbæ

Nýjung er á döfinni í skemmtanalífi Suðurnesjamanna, en Njarðvíkingurinn Atli Rúnar Hermannsson opnar nýtt kaffihús/bar að Hafnargötu 28 í Reykjanesbæ næsta föstudag. Staðurinn mun bera nafnið Yello.

Atli, sem hefur lengi þeytt skífum á flottustu skemmtistöðum höfuðborgarinnar, ss. Pravda, Thorvaldsen, Hressó og Hverfisbarnum, hefur búið og starfað í Reykjavík frá árinu 1998. Í samtali við Víkurfrétir sagðist hann spenntur fyrir að snúa aftur á gamlar slóðir. „Hér fékk ég fyrsta smjörþefinn af djamminu á áramótaballi í Stapa þegar eg var 16 ára. Hljómsveitin sem spilaði hét Mikki Refur, að mig minnir, en ég hafði hlakkað til þess allt haustið. Nú fannst mér vanta ákveðna tegund af stað hér í bænum og sá mér leik á borði þegar þetta húsnæði losnaði og sló til.“ Atli segir húsnæðið henta mjög vel fyrir kaffihús og bar en rýmið hefur tekið miklum breytingum frá því að saumastofan Liljur var starfrækt þar. „Ég er búinn að spila á óteljandi stöðum út um allt land og hef kynnst ýmsu, en ég fékk gæsahúð þegar ég gekk fyrst inn í salinn,” bætir Atli við. „Húsnæðið hentar mjög vel og er passlega stórt til að halda uppi góðri stemmningu. Ég hef spilað á þúsund manna böllum, en mér finnst alltaf betra að hafa um 100-150 manns því þá er maður í miklu betri snertingu við fólkið á gólfinu.“

Atli segist hafa mjög ákveðnar skoðanir á því hvernig Yello verði. „Þetta verður flottur og skemmtilegur staður, en það verður fjölbreytt dagskrá hjá okkur. Um helgar verður diskótek og fólk að skemmta sér, en á virkum dögum verður kaffihúsastemmning og rólegra yfirbragð. Þá verðum við kannski með trúbadora eða minni tónleika auk þess sem við stefnum að því að sýna listaverk á veggjum staðarins. Annars er þetta víðara veitingakonsept heldur en bara skemmtistaður því það verður líka hægt að leigja salinn út fyrir veislur og svo verðum við líka með boltann í beinni.“

Opnunarhátíðin hefst með veislu fyrir sérstaka boðsgesti sem stendur frá kl. 22 til miðnættis, en eftir það verður staðurinn opnaður fyrir almenna gesti og lofar Atli miklu fjöri í flottu umhverfi.