Opin æfing hjá Kór Keflavíkurkirkju
-kaffi, kleinur og kórsöngur
Kór Keflavíkurkirkju heldur opna æfingu í Bíósal Duushúsa miðvikudaginn 30. september kl. 18:00 þar sem nú stendur yfir sýningin Kirkjan mín, kirkjan þín, kirkjan okkar allra í tilefni af 100 ára afmæli kirkjunnar.
Alls starfa 50 félagar í kórnum sem stofnaður var árið 1942 og syngur hann við athafnir í Keflavíkurkirkju s.s. messur og útfarir en stendur jafnframt fyrir metnaðarfullum tónleikum á hverju ári undir dyggri stjórn organistans Arnórs B. Vilbergssonar.
Hér er kjörið tækifæri að kynnast starfi kórsins og tekið verður fagnandi á móti nýjum kórfélögum. Heitt á könnunni og kleinur í boði kórsins.
