Opið hús hjá Króki í Grindavík á laugardag

Heilsuleikskólinn Krókur Grindavík verður 5 ára 5. febrúar og af því tilefni verður opið hús laugardaginn 4. febrúar kl. 14:00-16:00. Sýning verður á verkum barnanna, leikefni, námsgögnum og ljósmyndum frá opnun skólans.

Markmiðið leikskólans er að auka gleði og vellíðan barnanna með áherslu á næringu, hreyfingu og listsköpun (tónlist og myndlist) í leik og starfi. Kjörorð okkar er heilbrigð sál í hraustum líkama.

Auk þessara þriggja áhersluþátta, sem er helsta einkenni heilsuleikskóla er lögð rík áhersla á frjálsan leik þar sem ákvörðunarréttur barnsins er virtur. Unnið er með könnunarleikinn sem er námsleið fyrir yngstu börnin í leikskólanum. Einnig er unnið markvisst með stærðfræðileiki- og þrautir, málörvun sem undirstaða læsis og jákvæð samskipti.

Við leggjum áherslu á þróunar- og nýbreytnistarf með það að markmiði að gera gott starf betra. Afrakstur þessa starfs er t.d. stærðfræði- og málörvunarverkefni, leikjahefti með íþróttaleikjum, vísindakassi, hlutverkakassar, víkingabúningar, deildarstjórahandbók o.f.l. sem verður til sýnis.

Formleg athöfn verður kl. 15:00 þegar ný heimasíða leikskólans verður opnuð og eru allir velkomnir.

Ráðgjöf - verktaka ehf
Leikskólinn Krókur