Nýtur þess að stússast í eldhúsinu

Á bæjarskrifstofunni í Sandgerði eru haldin litlu jól hjá starfsmönnum. Sigrún bæjarstjóri horfir á kvikmyndina Polar Express og hlustar á gömul íslensk jólakvæði til þess að komast í jólaskapið. Sigrún notar Þorláksmessu til þess að klára innkaup, undirbúa mat, þrífa, skreyta jólatréð, og hitta vini eða fjölskyldu.

Eru einhverjar hefðir hjá ykkur á bæjarskrifstofunni þegar kemur að jólunum?
Já, við höldum „litlu jólin“ og borðum þá saman, færum gjafir og njótum samverunnar á ýmsan hátt.  Auk þess hittumst við eina kvöldstund  og búum til eitthvað fallegt fyrir jólin.

Hvernig eru jólahefðir hjá þér?
Jólahefðir eru mjög sterkar hér á landi og þó þær séu misjafnar frá einni fjölskyldu til annarrar þá eru þær keimlíkar. Aðventan er upphaf jólahátíðarinnar og það finnst mér yndislegur tími. Þá byrjum við í minni fjölskyldu að setja upp jólaljós og fjölga kertum, og gera ýmislegt annað hefðbundið eins og t.d. að baka smákökur og  fara á jólatónleika sem mér finnst alveg ómissandi þáttur í aðdraganda jóla.

Hver er besta jólamyndin?
Ætli það sé ekki „The Polar Express“ sem ég hef margoft horft á með dóttursonum mínum og okkur finnst hún ævintýraleg og falleg.

Hvaða lag kemur þér í jólaskap?
Við tendrun jólaljósanna á jólatrénu hér í Sandgerði þann 3. desember  voru ýmis gömul og góð lög sem komu mér í jólaskap. Það voru lög eins og „Jólasveinar einn og átta“, „Nú er Gunna á nýju skónum“ og „Jólasveinar ganga um gólf“.

Ertu vanaföst um jólin, eitthvað sem þú gerir alltaf?
Það er margt sem ég geri alltaf þó ég sé ekkert sérstaklega vanaföst. Ég á  t.d. erfitt með að leggja þann sið af að skrifa jólakort og senda þess í stað rafræn. Hef prófað það en fannst þá eitthvað vanta svo ég helda bara áfram að skrifa á  jólakort og senda þau í pósti.

Hvernig er aðfangadagur hjá þér?
Aðfangadagur er ljúfur og rólegur, ég nýt þess að stússast í eldhúsinu, fara með pakka til systkina minna eða fá þau í heimsókn. Svo á góð vinkona mín afmæli á aðfangadag og hjá henni er alltaf opið hús í hádeginu og stundum lít ég við.

Eftirminnilegasta jólagjöf sem þú hefur fengið?
Satt best að segja kemur ekkert ákveðið upp í hugann, en mér finnst alveg nauðsynlegt að fá eins og eina bók.

Hvað er í matinn á aðfangadag?
Núna verða rjúpur í matinn á aðfangadagskvöld. Rjúpurnar og allt sem þeim fylgir gera  jólin enn hátíðlegri og við erum svo heppin að fá rjúpur annað árið í röð frá gömlum bekkjarfélaga mínum að austan.

Eftirminnilegustu jólin?
Það eru mörg jól sem eru mér eftirminnileg frá því ég var barn, jólin  með fyrsta barnabarninu, jól  í Jerúsalem sem þrátt fyrir allt voru svo miklu minna „jólaleg“ en við eigum að venjast hér heima.

Hvað langar þig í jólagjöf?
Bók.

Borðar þú skötu?
Já, ég borða skötu en get ekki sagt að ég hafi sérstakt dálæti á henni. Borða hana í mesta lagi einu sinni á ári og þá bara svona til að vera með.

Eru einhverjar hefðir í kringum Þorláksmessu hjá þér?
Það eru engar fastar hefðir á Þorláksmessu, dagurinn fer oft í að klára innkaup, undirbúa mat, skúra, skreyta jólatréð, og hitta vini eða fjölskyldu.