Nýtt og glæsilegt framreiðslueldhús

Nýtt og glæsilegt framreiðslueldhús hefur nú verið tekið í gagnið á Nesvöllum en hingað til hefur maturinn í þjónustumiðstöðinni verið aðsendur þangað. Fyrsta máltíðin var framreidd 1. apríl og var boðið upp á kótelettur í raspi með öllu tilheyrandi. Í eldhúsinu verða útbúnir um 200 matarskammtar í hádeginu alla daga ársins en þeir sem njóta góðs af því eru íbúar og starfsmenn á Nesvöllum og Hlévangi auk gesta í þjónustumiðstöðinni.

Þjónustumiðjan á Nesvöllum býður nú upp á hádegisverð alla virka daga og til skoðunar er að bjóða hið sama um helgar. Um 120 manns starfa á hjúkrunarheimilunum á Nesvöllum og Hlévangi að meðtöldum starfsmönnum í eldhúsi. Fyrsti íbúinn á Nesvöllum er Margrét Stefánsdóttir en hún flutti frá Garðvangi 16. mars sl. og voru henni færð blóm og konfekt af tilefninu.

Margrét ásamt Hrönn Ljótsdóttur forstöðumanni, Þuríði Elíasdóttur deildarstjóra á Nesvöllum, Guðmundi Hallvarðssyni stjórnarformanni Sjómannadagsráðs og Árna Sigfússyni bæjarstjóra.