Nýi löggubíllinn í hættu þegar ruslabíllinn mætti í skrúðgönguna

Skrúðganga á Sumardaginn fyrsta í Reykjanesbæ gekk vel en litlu munaði að hún færi í „ruslið“ í orðsins fyllstu merkingu. Skátafélagið hefur í áratugi séð um þennan viðburð og gert það mjög vel en skátarnir hafa alltaf haft lögregluna með sér til að leiða skrúðgönguna og flestum þykir nokkur hátíðarbragur á því.

Nú státaði Lögreglan á Suðurnesjum splunkunýjum Volvo lögreglubíl sem var í fararbroddi til að gangan gengi vel fyrir sig. Skondin uppákoma varð þó til þess að litlu munaði að stór sorphirðubíll æki á nýja lögreglubílinn og stoppaði auk þess gönguna því sorphirðumenn þurftu nauðsynlega að sækja sorptunnur við hús alveg við hringtorg Faxabrautar og Hringbrautar þegar gangan nálgaðist. Var sérstakt að sjá sorphirðumenn á harðahlaupum með bílinn stopp við hringtorgið. Lögreglumenn horfðu á þessa óvæntu uppákomu og hafa örugglega hugsað hvort ekki þyrfti að stoppa skrúðgönguna. En ruslakapparnir voru snöggir og rétt náðu að klára sitt verk og koma sér í burtu áður en skrúðgangan kom að hringtorginu. Og nýi löggubíllinn slapp líka en myndin sýnir nokkuð vel þessa spaugilegu uppákomu.