Ný sýning í Suðsuðvestri

Næstkomandi föstudag kl. 17 opna Libia Castro og Ólafur Ólafsson sýningu í Suðsuðvestur í Reykjanesbæ.
Þau munu sýna myndbandsverkið Caregivers (2008) sem þau unnu fyrir Evrópu tvíæringinn Manifesta 7 sem haldinn var í Trentino héraðinu á Norður Ítalíu á síðasta ári.

Myndbandið sem tekið er í Trentino, dregur upp mynd af tveimur konum, innflytjendum frá  Rúmeníu og  Úkraínu, sem fluttust til Ítalíu til að vinna við umönnun aldraðra í heimahúsum.
Í myndbandinu blandast saman heimildarmynda- og tónlistarmyndbandagerð, blaðamennska og klassísk samtímatónlist. Tónlistin í verkinu, sem samin er við blaðagrein er fjallar um sama viðfangsefni, er samin af Karólínu Eiríksdóttur og flutt af Ingibjörgu Guðjónsdóttur sópransöngkonu, Matthíasi Nardeau óbóleikara og Kvennakór Garðabæjar.

Libia og Ólafur hafa sýnt víða erlendis og á Íslandi síðan samstarf þeirra hófst fyrir tólf árum. Auk þátttöku þeirra í Manifesta 7 má nefna sýninguna „Allir gera það sem þeir geta” í Hafnarhúsinu á síðasta ári, auk þess sem þau voru tilnefnd til hinna virtu hollensku Prix de Rome verðlauna 2009 og hlutu þau þriðju verðlaun fyrir verkið „Lobbyists”.

Caregivers hefur m.a. verið sýnt í Zacheta National Gallery of Art í Varsjá, á Cuvée tvíæringnum í OK Center fro Contemporary Art í Linz, í David Roberts Arts Foundation Fitzrovia í London og á einkasýningu listamannanna í Galerie Opdahl í Berlín.

Sýningin mun standa til 11.október.
Suðsuðvestur er til húsa að Hafnargötu 22, Reykjanesbæ.

Opnunartími:  laugardaga og sunnudaga frá kl.14:00 – kl.17:00 og eftir samkomulagi í
síma; 662 8785.
www.sudsudvestur.is