Ný skipslíkön Gríms sýnd í íþróttahúsinu
Fimmtudaginn 5. júlí kl. 15.00 verður opnuð sýning á nýjum skipslíkönum eftir Grím Karlsson í íþróttahúsinu við Sunnubraut. Sýningin samanstendur af 30 líkönum ásamt munum og myndum tengdum sjávarútvegi sem eru í eigu Gríms. Sýningin verður opin alla daga frá kl. 13.00 – 17.00 og stendur fram yfir verslunarmannahelgi. Aðgangur er ókeypis og allir velkomnir. Á sýningunni má sjá Marsley, skip Hans Söbslad. Einnig Ónefnda skipið sem aldrei fékk nafn og aldrei var byggt. Sjá má Gránu, Helgu og Sophie Wheatly sem mörkuðu djúp spor í sjálfstæðisbaráttu og verslunarsögu þjóðarinnar.
11 Svíþjóðabátar eru á sýningunni. Þar á meðal fyrsti og síðasti báturinn sem komu, Hafdís RE 66 og otur RE 32 og sá eini sem eftir er í dag af 80 skipa flota sem kom frá Svíþjóð eftir stríðið, Þorsteinn GK 15.
Einnig er fróðlegt að skoða ýmsa muni og handverkfæri sem notuð voru fyrir vélvæðinguna í fiskiðnaði. „Þessi verkfæri og handleggirnir á fólkinu sáu um fyrstu stóriðju Íslendinga fram yfir 1950,“ segir Grímur Karlsson, en líkönin, myndirnar og munirnir eru í hans eigu.
Sýningin er haldin á vegum Félags áhugamanna um Bátasafn Gríms Karlssonar með aðstoð Reykjanesbæjar.
Áhugasömum er einnig bent á sýninguna Bátaflota Gríms Karlssonar í Duushúsum þar sem sjá má auk tæplegra 90 bátalíkana, muni og myndir sem tengjast sjávarútvegssögu þjóðarinnar.
VF-Mynd úr safni - Séð yfir bátasafnið í Duushúsum
