Norskar poppstjörnur leigðu kvikmyndaver á Ásbrú

Tökur á nýju tónlistarmyndbandi með norsku poppstjörnunni Atle Pettersen og hinum upprennandi rappara Rex, fara fram í Atlantic Studios á Ásbrú í þessum töluðu orðum. Atlantic Studios er kvikmyndaver í gömlum húsakynnum herflugvéla bandaríska hersins. Blaðamaður Víkurfrétta kíkti á tökustað og fylgdist með því hvernig tónlistarmyndband verður til.

Daniel Hamnes, umboðsmaður Rex er hálfíslenskur og hann hafði lengi langað að vinna á Íslandi sagði Rex í samtali við Víkurfréttir. Rex vildi einnig ólmur koma hingað og leist vel á aðstæðurnar og þær hugmyndir sem kynntar voru fyrir þeim þegar þeim stóð til boða að taka myndbandið upp hérlendis. Hann sagði að þeir Atle væru aðallega búinir að vera í tökum frá því að þeir komu til landsins í gær en til stæði að heimsækja Bláa Lónið í kvöld. Rex samdi lagið fyrir um ári síðan og fékk í kjölfarið Atle til liðs við sig og hafa þeir félagar mikla trú á laginu sem er kröftugt rapplag með rokkívafi. ??Haffi Haff er listrænn stjórnandi myndbandsins og hann var önnum kafinn þegar blaðamann bar að garði og augljóst að hann var allt í öllu á staðnum.

Atle Pettersen er sjóðheitur í Noregi um þessar mundir. Hann hefur átt mörg lög á vinsældalistum og varð hlutskarpastur í sjónvarpsþættinum Dancing with the Stars. Áður hafði hann lent í öðru sæti í X-Factor þar í landi. Lagið sem þeir Rex syngja í myndbandinu heitir Amazing og leikstjóri verður Gus Ólafsson sem hefur starfað mikið úti í Los Angeles.

Að sögn Elísabetar Thoroddsen hjá auglýsingarstofunni PIPAR/TBWA þá er umboðsskrifstofan sem Daniel vinnur hjá á meðal þeirra fimm stærstu í Noregi. „Það er mikill áhugi fyrir Íslandi úti. Þeim finnst þetta dálítið framandi að koma hingað og vinna. Það er fullt af listamönnum sem hafa áhuga á að koma hingað og þetta myndband gæti orðið farvegur fyrir einhver fleiri skemmtileg og stór verkefni. Framkvæmdarstjóri PIPAR/TBWA, Valgeir Magnússon, eða Valli sport eins hann er oft nefndur, segir að hann hafi fengið hugmyndina af því að nota kvikmyndaverið á Ásbrú því að hann vantaði stærðina sem það hefur upp á að bjóða. Þarna sé hægt að taka upp allar senur myndbandsins án vandkvæða og segir hann húsnæðið vera kjörið fyrir verkefni sem þessi.

Haffi Haff sá um að olíubera rapparann Rex





Félagarnir í kvikmyndaverinu

Myndir/EJS: Á efstu myndinni er Atle hægra meginn og Rex á vinstri hönd.