Nærri 20.000 gestir á opnum Ásbrúardegi

Á sumardaginn fyrsta var opinn dagur á Ásbrú. Fyrirtæki á svæðinu tóku höndum saman og kynntu starfssemi sína. Gríðarlegur fjöldi heimsótti svæðið og sannarlega var mikið um að vera.

Strax um hádegi byrjaði fólk að streyma að og eftir því sem leið á daginn jókst umferðin. Um tíma má segja að hafi verið örtröð á Ásbrú – slík var umferðin. Með samstilltu átaki allra aðila tókst þó að greiða vel úr og var ekki annað að sjá en fólk væri ánægt með það sem í boði var. Bylgjan var með beina útsendingu úr Keili. Fjölmargir af höfuðborgarsvæðinu renndu suðureftir og þá létu Suðurnesjabúar sig ekki vanta.

Mikill áhugi virtist á námi Keilis og hinum rómuðu íbúðum á Ásbrú. Fjölskylduratleikurinn teygði leiki sína um Ásbrúarsvæðið með góðri þátttöku og góðir vinningar í boði. Söguferðir með SBK um Ásbrú hrifu marga sem aldrei höfðu komið inn á þetta svæði áður. Baseball félög af höfuðborgarsvæðinu tóku fyrstu æfingu ársins utandyra, fornbílar spókuðu sig við Top of the Rock, Landhelgisgæslan „bjargaði“ flugfreyjum Keilis með þyrlu. Ny´ju vélmenni Keilis voru kynnt, efnafræðingur bjó til „kreppusælgæti“ og fjölmörg fyrirtæki hér á Ásbrú kynntu sig.

Stærsti slökkvibíll í heimi ásamt lögreglu-, sjúkra-, eiturefna- og körfubíl vöktu verðskuldaða athygli utan við Atlantic Studios en inni sló Karnival með alls kyns leiktækjum og annarri skemmtun algjörlega í gegn. Þar var örtröð um tíma en börn jafnt sem fullorðnir skemmtu sér einstaklega vel og allt fór vel fram.

Opinn dagur á Ásbrú er kominn til að vera. Talið er að hátt í 20.000 manns hafi sótt kynningar og skemmtanir þennan dag. Aðstandendur vilja þakka öllum sem lögðu hönd á plóg fyrir frábært samstarf. Áhersla er lögð á að allir finni eitthvað við sitt hæfi. Gestir og sy´nendur virðast hafa náð því marki. Undirbúningur að Opnum degi á næsta ári er þegar hafinn.

Ljósmyndir: Hilmar Bragi Bárðarson - fleiri myndir í myndasafni hér á vf.is