Mörtu gengur vel á Grænlandi

Grindvíkingnum Mörtu Guðmundsdóttur og ferðafélögum hennar gengur vel á leið sinni yfir Grænlandsjökul, en ferð þeirra hófst 21. maí.

Marta fór í þessa ferð til að vekja athygli á forvörnum gegn brjóstakrabbameini og til að selja kort til að styrkja rannsóknir á krabbameini. Þau eru nú meira en hálfnuð á leið sinni yfir jökulinn og komust í gær yfir hæsta tind Grænlandsjökuls. Þá settu þau nýtt met á ferð sinni er þau lögðu að baki rúma 50 km á einum degi, en þau ferðast á hundasleðum.

Marta skrifar á bloggsíðu sína í gær:

Sunnudagur 3. júní - Nýtt met!
Hæ allir.
Við vöknuðum í sól og blíðu sunnudagsmorgun þannig að það var þess virði að bíða. Þutum svo áfram og slógum mörg met, gengum 50 km og allir glaðir.

Það var ótrúlegt að vera á jöklinum í svona veðri og í raun erfitt fyrir mig að lýsa því. Upplifun sem mun aldrei gleymast. Nú er nefið rautt og aumt og engin krem virka eða duga á trúðanebbann. Fjölbreytni í matarboxinu er orðin frekar lítil, endalaust hrökkbrauð og kavíar. Allir að kafna úr svitafýlu eftir daginn.