Mikið fjör á árshátíð í Heiðarskóla
Fimmtudaginn 14. mars var mikið fjör í Heiðarskóla en þá hélt skólinnárshátíð sína. Nemendur og starfsmenn skólans höfðu unnið hörðum höndum að undirbúningi síðustu vikurnar fyrir árshátíðina við æfingar og skreytingar á skólanum.
Óhætt er að segja að vel hafi tekist til. Á þriðja tug fjölbreyttra
skemmtiatriða voru sýnd á þremur sýningum við mikinn fögnuð áhorfenda, sérstaka athygli vöktu kennararatriðin!
Allir árgangar skólans tóku virkan þátt í skemmtunum, frá 1. bekk upp í 10.
bekk, þar sem nemendur skólans léku tónlist, sungu, sýndu leikrit, sýndu
dans eða fóru með gamanmál. Nemendurnir höfðu skemmtan af, stóðu sig glæsilega undir öruggri handleiðslu þeirra sem þjálfuðu þau og sýndu öll, á sinn hátt, sína bestu hlið.
Eftirtektarvert var að nemendur Heiðarskóla sýndu einnig að þeir
kunna að njóta skemmtiatriða, þeir eru þroskaðir áhorfendur skóla sínum til mikils sóma. Afraksturinn var eftirminnilegur dagur fyrir alla í
Heiðarskóla. Myndirnar hér fyrir neðan fengum við sendar úr skólanum.
