Mesta jólabarn Grindavíkur?

„Víkurfréttir calling…“

Svona hófst Facebook-færsla blaðamanns Víkurfrétta á dögunum en þar var auglýst eftir þeim Grindvíkingi sem teldist vera mesta jólabarnið og voru nokkir möguleikar gefnir á að uppfylla skilyrðin; jólaskreytingar, fjöldi smákökutegunda, stærsta jólatréið, skrýtnustu jólanærbuxurnar svo einhver dæmi séu tekin.

Spjótin beindust fljótlega að Klöru Bjarnadóttur en hún er aðflutt, gift Ómari Enokssyni. Hún uppfyllti öll þessi skilyrði - þó er ekki vitað um skrýtnu jólanærbuxurnar…

Aðspurð sagðist Klara ekki hafa orðið svo mikið jólabarn eins og hún er í dag, fyrr en hún stofnaði fjölskyldu en að koma að húsi þeirra hjóna að Selsvöllum 14 og hvað þá inn í það, var eins og ganga inn í jólakvikmynd…

Klara byrjar að skreyta í byrjun nóvember, jólatréð er alltaf komið upp á fyrsta degi aðventu og helst vill hún að þær tíu til fimmtán smákökutegundir sem hún bakar, séu búnar áður en sjálf jólin ganga í garð!

Meðfylgjandi myndir lýsa vonandi jólagleði Klöru og fjölskyldunnar á Selsvöllum 14 í Grindavík, þó vantar aðeins inn í jöfnuna því Ómar sem er erlendis vegna vinnu, á eftir að koma jólasveinum upp sem hanga utan á húsinu, ásamt öðru skrauti fyrir í garðinum. Fjölskyldan stefnir á að allt verði komið upp í byrjun næstu viku, sjón verður sögu ríkari!