Máttugar konur á Suðurnesjum

Mikið var um að vera í Viðskipaháskólanum á Bifröst í lok apríl en þá útskrifuðust 42 konur úr 11 vikna rekstrarnámi fyrir konur í atvinnurekstri. Níu konur af Suðurnesjum voru meðal þeirra sem útskrifuðust.

Af þátttökunni má merkja að mikil þörf er fyrir nám sem þetta. Hópurinn sem útskrifaðist nú var annar hópurinn sem líkur þessu námi en í allt hafa rúmlega 100 konur klárað rekstrarnámið í Mætti kvenna.

Algengt er að þær konur sem stundað hafa námið reki þjónustufyrirtæki á landsbyggðinni. Margar þeirra hafa áratuga reynslu af fyrirtækjarekstri án þess að hafa sértæka undirstöðumenntun. Fyrirtæki þeirra eru oftar en ekki kjölfestan í þeirri einkareknu þjónustu sem íbúum stendur til boða.

Flestar þeirra sem útskrifuðust og eru af Suðurnesjunum eru sjálfar í atvinnurekstri. Þær sögðu námið skemmtilegt, fróðlegt og gagnlegt fyrir konur, sér í lagi til að kynnast öðrum konum utan af landi sem eru í svipuðum aðstæðum.

Aðalheiður Hilmarsdóttir, Einarína Sigurjónsdóttir, Elín H. Hermannsdóttir, Hanna O. Herstedt og Sjöfn Olgeirsdóttir úr Reykjanesbæ. Guðrún J. Jónsdóttir, Kolbrún Vídalín, Rósa Guðnadóttir frá Sandgerði og Kristbjörg Hermannsdóttir frá Grindavík.