Margrét S. Sigurðardóttir Grindvíkingur ársins

Margrét S. Sigurðardóttir var á dögunum valin Grindvíkingur ársins. Hún er fyrrum forstöðukona bókasafns Grunnskóla Grindavíkur og er nú sjálfboðaliði við skólann. Á vef Grindavíkurbæjar segir að undanfarin ár hafi Margrét verið óþreytandi í sjálfboðaliðastarfi við skólann þar sem hún aðstoðar nemendur við lestur og heimanám, bæði á skólatíma og eftir að honum lýkur, þegar þannig stendur á.

Á vef bæjarfélagsins segir jafnframt að þó að Margrét sé sjálfboðaliði við skólann gæti margir haldið að hún væri ennþá meðal starfsmanna þar, þar sem hún sé á svæðinu flesta daga. Á hverju hausti sest hún niður með deildarstjóra og setur saman stundatöflu fyrir sig og mætir svo í skólann og aðstoðar nemendur fyrst og fremst við lestur. Þar segir einnig að Margrét sé alltaf boðin og búin að taka þátt í ýmsum tilfallandi verkefnum við skólann og að framlag hennar til skólamála í Grindavík sé í raun ómetanlegt.