Margir vilja fara út að leika

„Ég hef aðallega verið að fá viðbrögð í formi samskipta á Facebook. Hugmyndir hafa kviknað víða um virkja íbúa hverfa til samveru og útiveru. Fólk hefur spurt okkur hjónin hvernig hægt sé að koma hugmyndum í framkvæmd. Fólk þurfti bara smá spark í rassinn,“ segir Guðmundur Stefán Gunnarsson, íbúi í Reykjanesbæ. 

Víkurfréttir birtu í síðustu viku grein eftir hann, „Klukk, þú ert’ann!“ sem vakið hefur mikla athygli. Greininni hefur m.a. verið deilt á hverfissíðum á Facebook og umræða hefur orðið um að sniðugt væri að sameinast um að skipuleggja útiveru foreldra og barna. „Í mínu hverfi ætlum við t.d. að hittast við Akurskóla í næstu viku og fara í leiki með börnunum okkar og grilla saman og fara í leiki á Jónsmessunni. Þetta er sjálfbært verkefni og það er sjálfsagt að hjálpa fólki að finna réttu leiðirnar til að koma hugmyndum sínum í framkvæmd. Hættum að röfla um hvað allt er dýrt og gerum það sem við getum gert til að búa til betra samfélag fyrir krakkana okkar,“ segir Guðmundur.