Margir heilsuðu upp á sauðkindina

Nokkur hundruð gestir lögðu leið sína í sérstaka vorveislu í Sandgerði um liðna helgi þar sem haldin var hátíð til heiðurs íslensku sauðkindinni. Hátíðin var í Listatorgi þar sem dagskráin fór fram.

Félagar í Listatorgi, lista- og menningarmálafélagi bæjarins ákváðu snemma í haust að undirbúa þennan viðburð til þess að varpa ljósi á hlutverk og notagildi hinnar íslensku sauðkindar í gegnum aldirnar.

Þar voru málverk með sauðkindinni í alls konar útfærslum, ullarvörur, glerlistaverk, leirlistaverk, servíettur, póstkort, skartgripir og fleira fallegt handverk til sýnis og sölu. Ull var spunnin á rokk og ljóð lesin. Fræðslukorn um sauðkindina voru frá nemendum grunnskólans.

Meðfylgjandi myndir voru teknar í Sandgerði á laugardaginn.

Víkurfréttamyndir: Hilmar Bragi Bárðarson