Lýðveldinu fagnað í Grindavík

Þjóðhátíðardeginum var fagnað í Grindavík síðasta laugardag en í ár eru 79 ár liðin frá stofnun lýðveldisins Íslands.

Hátíðarhöld í Grindavík hófust með hátíðarstund í Grindavíkurkirkju. Þar fluttu ávörp þær Ásrún Kristinsdóttir, forseti bæjarstjórnar, og sr. Elínborg Gísladóttir, sóknarprestur í Grindavík. Ásrúnu voru jafnréttismálin hugleikin en í máli hennar kom m.a. fram að lýðræði er alltaf samofið jafnrétti. Elínborg fjallaði m.a. um mikilvægi málfrelsis sem þjóðin þarf að höndla með virðingu, ábyrgð og kærleika. Þá söng Kirkjukór Grindavíkur ættjarðarlög.

Frá árinu 1984 hefur fjallkona, tákngervingur Íslands, komið fram við hátíðarhöld í tilefni af 17. júní í Grindavík. Í ár var Tinna Hrönn Einarsdóttir í hlutverki fjallkonu Íslands. Hún er sú fertugasta til að klæðast búningnum.

Eftir hádegi var íbúum og gestum boðið í Kvikuna. Þar gátu börn hoppað í hoppuköstulum, farið á hestbak og fengið andlitsmálningu. Þá var boðið upp á kaffiveitingar í tilefni dagsins.