LJÓSMYNDIN ÍMYNDIN PORTRETTIÐ?: Síðasta sýningarhelgi í listasafninu

Myndlistarmennirnir Karl Jóhann Jónsson og Sigríður Melrós Ólafsdóttir munu verða með leiðsögn fyrir almenning um sýningu sína, Ljósmyndin, Ímyndin, Portrettið? í Listasal Duushúsa laugardaginn 3. maí kl. 14.30. Sýningunni lýkur daginn eftir.

Á sýningunni mætast portrettverk þeirra beggja sem öll eru unnin út frá ljósmyndum en með afar ólíkri nálgun á viðfangsefninu. Sigríður Melrós sýnir grafíkverk og olíumálverk af sömu manneskjunni sem er nektardansmærin Lísa auk annarra grafíkmynda. Karl Jóhann sýnir málverk af fólkinu í kringum hann sem hann setur gjarnan í ný hlutverk. Hvert verk sýnir einhvern atburð eða stemmningu sem Karl spinnur upp og sviðsetur.

Sýningin hefur fengið góða dóma, að því er fram kemur í tilkynningu, og fjöldi gesta lagt leið sína í Duushúsin til að njóta verkanna. Sýningarstjóri sýningarinnar er Inga Þórey Jóhannsdóttir sem sést á myndinni á milli listamannanna.