Ljósmyndasafn: Riðu um héruð í sex daga

Snemma sumars fara margir hestamenn á Suðurnesjum með klára sína austur í sveitir í sumarhaga. Sameinast fólk þá gjarnan í stórum „sleppitúr” eins og hestamenn kalla það en hann stendur yfir í nokkra daga.
Nú á dögunum fóru um 50 félagar í hestamannafélaginu Mána ríðandi meðfram suðurströndinni með stórt hestastóð til sumarbeitar og tók túrinn 6 daga. Um 80 hestar voru í stóðinu og eins og vænta mátti var stemmningin afar góð. Eftir hverja dagleið sameinaðist fólk svo yfir grilli og skemmtilegum kvöldvökum.
Nokkuð er um að Suðurnesjamenn hafi fjárfest í landskikum í sveitum Ölfus- og Árnessýslna þar sem þeir hafa komið sér upp aðstöðu til að stunda hestamennsku í sveitasælunni.

Ellert Grétarsson, ljósmyndari Víkurfrétta, slóst í för með hestafólkinu og eru myndir úr ferðinni komnar inn ljósmyndavef Víkurfrétta hér á vf.is undir heitinu Hestar og menn

---