Leoncie slær í gegn í Kanada

Leoncie hefur slegið rækilega í gegn í Kanada. Söngkonan var að koma frá Toronto þar sem hún var að taka upp fjögur lög. Að sögn talsmanns hennar fékk hún mikið lof fyrir tónlist sína í hljóðveri í Toronto og mun að sögn eiga greiða leið inn á tónlistarmarkaði bæði í Kanada og Bandaríkjunum.
Tónlistin sem tekin var upp í Toronto er í stíl við Ást á barnum, sem gerði stormandi lukku hér heima á klakanum fyrir nokkrum misserum. Leoncie mun ætla að taka upp nokkur lög til viðbótar hér heima á Íslandi í sumar, auk þess sem heimskunnur kvikmyndagerðarmaður mun gera með henni tónlistarmyndbönd að sögn talsmanns söngkonunnar.
„Leoncie er að flytja erlendis til að fylgja tónlistinni sinni eftir, enda mun tónlist hennar njóta vinsælda vestanhafs“, sagði talsmaður söngkonunnar að endingu. Hún mun þó ætla að eiga hús sitt áfram í Sandgerði.